Sensa hefur endurnýjað samstarf sitt við Juniper. Með samstarfinu styrkir Sensa enn frekar vöru– og þjónustuframboð sitt á sviði netlausna og mætir vaxandi eftirspurn eftir sveigjanlegum og öruggum lausnum. Lausnir Juniper styðja við nútímalegan netrekstur og gera Sensa kleift að mæta síbreytilegum kröfum viðskiptavina um öruggar, skalanlegar og framtíðarmiðaðar netlausnir.
„Það er okkur afar mikilvægt að geta uppfyllt þarfir viðskiptavina okkar og það gerum við með því að endurskoða stöðugt vöruframboð okkar og þjónustu. Við höfum alla tíð kappkostað við að veita viðskiptavinum okkar framúrskarandi þjónustu og setjum þarfir þeirra í forgang. Með það að leiðarljósi erum við í stöðugri rýni á lausnaframboði okkar og var því ákveðið að taka upp þráðinn á ný með Juniper,“ segir Þröstur Sigurjónsson, framkvæmdastjóri viðskipta og vaxtar hjá Sensa.
“Sensa hefur áður verið í samstarfi við Juniper og er því sérstaklega ánægjulegt að taka upp samstarfið á nýjan leik. Sú djúpa þekking sem Sensa hefur byggt upp í gegnum árin á sviði netlausna mun nýtast vel í þessu nýja samstarfi, líkt og hjá öðrum samstarfsaðilum fyrirtækisins. Okkur hlakkar mikið til að sýna viðskiptavinum okkar hvernig Juniper passar inn í lausnaframboð okkar og styrkir enn frekar þá heildarlausn sem við bjóðum upp á,“ segir Haukur Þórðarson, deildastjóri netlausna hjá Sensa.
Netsérfræðingar Sensa hafa nú þegar staðist vottunarpróf sem staðfesta þekkingu þeirra á lausnum Juniper.